1 Wathesalonike - Sura ya 5

¹Lakini, ndugu, kwa habari ya nyakati na majira, hamna haja niwaandikie.

²Maana ninyi wenyewe mnajua yakini ya kuwa siku ya Bwana yaja kama vile mwivi ajavyo usiku.

³Wakati wasemapo, Kuna amani na salama, ndipo uharibifu uwajiapo kwa ghafula, kama vile utungu umjiavyo mwenye mimba, wala hakika hawataokolewa.

⁴Bali ninyi, ndugu, hammo gizani, hata siku ile iwapate kama mwivi.

⁵Kwa kuwa ninyi nyote mmekuwa wana wa nuru, na wana wa mchana; sisi si wa usiku, wala wa giza.

⁶Basi tusilale usingizi kama wengine, bali tukeshe, na kuwa na kiasi.

⁷Maana walalao usingizi hulala usiku, pia na walewao hulewa usiku.

⁸Lakini sisi tulio wa mchana, tuwe na kiasi, hali tukijivika kifuani imani na upendo, na chapeo yetu iwe tumaini la wokovu.

⁹Kwa kuwa Mungu hakutuweka kwa hasira yake, bali tupate wokovu, kwa Bwana wetu Yesu Kristo;

¹⁰ambaye alikufa kwa ajili yetu, ili tuishi pamoja naye, kwamba twakesha au kwamba twalala.

¹¹Basi, farijianeni na kujengana kila mtu na mwenzake, vile vile kama mnavyofanya.

¹²Lakini, ndugu, tunataka mwatambue wale wanaojitaabisha kwa ajili yenu, na kuwasimamia ninyi katika Bwana, na kuwaonyeni;

¹³mkawastahi sana katika upendo, kwa ajili ya kazi zao. Iweni na amani ninyi kwa ninyi.

¹⁴Ndugu, twawasihi, waonyeni wale wasiokaa kwa utaratibu; watieni moyo walio dhaifu; watieni nguvu wanyonge; vumilieni na watu wote.

¹⁵Angalieni mtu awaye yote asimlipe mwenziwe mabaya kwa mabaya; bali siku zote lifuateni lililo jema, ninyi kwa ninyi na kwa watu wote.

¹⁶Furahini siku zote;

¹⁷ombeni bila kukoma;

¹⁸shukuruni kwa kila jambo; maana hayo ni mapenzi ya Mungu kwenu katika Kristo Yesu.

¹⁹Msimzimishe Roho;

²⁰msitweze unabii;

²¹jaribuni mambo yote; lishikeni lililo jema;

²²jitengeni na ubaya wa kila namna.

²³Mungu wa amani mwenyewe awatakase kabisa; nanyi nafsi zenu na roho zenu na miili yenu mhifadhiwe mwe kamili, bila lawama, wakati wa kuja kwake Bwana wetu Yesu Kristo.

²⁴Yeye ni mwaminifu ambaye awaita, naye atafanya.

²⁵Ndugu, tuombeeni.

²⁶Wasalimuni ndugu wote kwa busu takatifu.

²⁷Nawaapisha kwa Bwana, ndugu wote wasomewe waraka huu.

²⁸Neema ya Bwana wetu Yesu Kristo na iwe pamoja nanyi.