2 Timotheo - Sura ya 4

¹Nakuagiza mbele za Mungu, na mbele za Kristo Yesu, atakayewahukumu walio hai na waliokufa; kwa kufunuliwa kwake na kwa ufalme wake;

²lihubiri neno, uwe tayari, wakati ukufaao na wakati usiokufaa, karipia, kemea, na kuonya kwa uvumilivu wote na mafundisho.

³Maana utakuja wakati watakapoyakataa mafundisho yenye uzima; ila kwa kuzifuata nia zao wenyewe watajipatia waalimu makundi makundi, kwa kuwa wana masikio ya utafiti;

⁴nao watajiepusha wasisikie yaliyo kweli, na kuzigeukia hadithi za uongo.

⁵Bali wewe, uwe na kiasi katika mambo yote, vumilia mabaya, fanya kazi ya mhubiri wa Injili, timiliza huduma yako.

⁶Kwa maana, mimi sasa namiminwa, na wakati wa kufariki kwangu umefika.

⁷Nimevipiga vita vilivyo vizuri, mwendo nimeumaliza, Imani nimeilinda;

⁸baada ya hayo nimewekewa taji ya haki, ambayo Bwana, mhukumu mwenye haki, atanipa siku ile; wala si mimi tu, bali na watu wote pia waliopenda kufunuliwa kwake.

⁹Jitahidi kuja kwangu upesi.

¹⁰Maana Dema aliniacha, akiupenda ulimwengu huu wa sasa, akasafiri kwenda Thesalonike; Kreske amekwenda Galatia; Tito amekwenda Dalmatia.

¹¹Luka peke yake yupo hapa pamoja nami. Umtwae Marko, umlete pamoja nawe, maana anifaa kwa utumishi.

¹²Lakini Tikiko nalimpeleka Efeso.

¹³Lile joho nililoliacha kwa Karpo huko Troa, ujapo ulilete, na vile vitabu, hasa vile vya ngozi.

¹⁴Iskanda, mfua shaba, alionyesha ubaya mwingi kwangu; Bwana atamlipa sawasawa na matendo yake.

¹⁵Nawe ujihadhari na huyo, kwa sababu aliyapinga sana maneno yetu.

¹⁶Katika jawabu langu la kwanza hakuna mtu aliyesimama upande wangu, bali wote waliniacha; naomba wasihesabiwe hatia kwa jambo hilo.

¹⁷Lakini Bwana alisimama pamoja nami akanitia nguvu, ili kwa kazi yangu ule ujumbe utangazwe kwa utimilifu, hata wasikie Mataifa yote; nami nikaokolewa katika kinywa cha simba.

¹⁸Bwana ataniokoa na kila neno baya, na kunihifadhi hata nifike ufalme wake wa mbinguni. Utukufu una Yeye milele na milele. Amina.

¹⁹Nisalimie Priska na Akila, na wale wa nyumbani mwa Onesiforo.

²⁰Erasto alikaa Korintho. Trofimo nalimwacha huko Mileto, hawezi.

²¹Jitahidi kuja kabla ya wakati wa baridi. Eubulo akusalimu, na Pude, na Lino, na Klaudia, na ndugu wote pia.

²²Bwana na awe pamoja na roho yako. Neema na iwe pamoja nanyi.