Wagaltia - Sura ya 5

¹Katika ungwana huo Kristo alituandika huru; kwa hiyo simameni, wala msinaswe tena chini ya kongwa la utumwa.

²Tazama, mimi Paulo nawaambia ninyi ya kwamba, mkitahiriwa, Kristo hatawafaidia neno.

³Tena namshuhudia kila mtu atahiriwaye, kwamba ni wajibu wake kuitimiza torati yote.

⁴Mmetengwa na Kristo, ninyi mtakao kuhesabiwa haki kwa sheria; mmeanguka na kutoka katika hali ya neema.

⁵Maana sisi kwa Roho tunalitazamia tumaini la haki kwa njia ya imani.

⁶Maana katika Kristo Yesu kutahiriwa hakufai neno, wala kutokutahiriwa, bali imani itendayo kazi kwa upendo.

⁷Mlikuwa mkipiga mbio vizuri; ni nani aliyewazuia msiitii kweli?

⁸Kushawishi huku hakukutoka kwake yeye anayewaita ninyi.

⁹Chachu kidogo huchachua donge zima.

¹⁰Nina matumaini kwenu katika Bwana, ya kwamba hamtakuwa na nia ya namna nyingine. Lakini yeye anayewafadhaisha atachukua hukumu yake, awaye yote.

¹¹Nami, ndugu zangu ikiwa ninahubiri habari ya kutahiriwa, kwa nini ningali ninaudhiwa? Hapo kwazo la msalaba limebatilika!

¹²Laiti hao wanaowatia mashaka wangejikata nafsi zao!

¹³Maana ninyi, ndugu, mliitwa mpate uhuru; lakini uhuru wenu usiwe sababu ya kuufuata mwili, bali tumikianeni kwa upendo.

¹⁴Maana torati yote imetimilika katika neno moja, nalo ni hili, Umpende jirani yako kama nafsi yako.

¹⁵Lakini mkiumana na kulana, angalieni msije mkaangamizana.

¹⁶Basi nasema, Enendeni kwa Roho, wala hamtazitimiza kamwe tamaa za mwili.

¹⁷Kwa sababu mwili hutamani ukishindana na Roho, na Roho kushindana na mwili; kwa maana hizi zimepingana, hata hamwezi kufanya mnayotaka.

¹⁸Lakini mkiongozwa na Roho, hampo chini ya sheria.

¹⁹Basi matendo ya mwili ni dhahiri, ndiyo haya, uasherati, uchafu, ufisadi,

²⁰ibada ya sanamu, uchawi, uadui, ugomvi, wivu, hasira, fitina, faraka, uzushi,

²¹husuda, ulevi, ulafi, na mambo yanayofanana na hayo, katika hayo nawaambia mapema, kama nilivyokwisha kuwaambia, ya kwamba watu watendao mambo ya jinsi hiyo hawataurithi ufalme wa Mungu.

²²Lakini tunda la Roho ni upendo, furaha, amani, uvumilivu, utu wema, fadhili, uaminifu,

²³upole, kiasi; juu ya mambo kama hayo hakuna sheria.

²⁴Na hao walio wa Kristo Yesu wameusulibisha mwili pamoja na mawazo yake mabaya na tamaa zake.

²⁵Tukiishi kwa Roho, na tuenende kwa Roho.

²⁶Tusijisifu bure, tukichokozana na kuhusudiana.