Ayubu - Sura ya 16

¹Ndipo Ayubu akajibu, na kusema,

²Nimesikia maneno mengi mfano wa hayo; Ninyi nyote ni wafariji wenye kutaabisha.

³Je! Maneno yasiyo faida yatakuwa na mwisho? Au, kuna nini kinachokukasirisha, hata ukajibu?

⁴Mimi nami ningeweza kunena kama ninyi; Kama roho zenu zingekuwa mahali pa roho yangu, Ningeweza kutunga maneno juu yenu, Na kuwatikisia ninyi kichwa changu.

⁵Lakini ningewatia nguvu kwa kinywa changu, Na utuzo wa midomo yangu ungetuliza.

⁶Nijapokuwa nanena, huzuni yangu haitulizwi; Nijapokuwa najizuia, nimepunguziwa kitu gani?

⁷Lakini sasa amenichokesha; Jamii yangu yote umeifanya ukiwa.

⁸Umenishika sana, ni ushahidi juu yangu; Na kukonda kwangu kwaniinukia, kwanishuhudia usoni pangu.

⁹Amenirarua katika ghadhabu zake, na kunionea; Amesaga-saga meno juu yangu; Mtesi wangu hunikazia macho makali.

¹⁰Wamenifumbulia vinywa vyao; Wamenipiga shavuni kwa kunitukana; Hujikutanisha pamoja juu yangu.

¹¹Mungu amenitia kwa hao wapotovu, Na kunitupa mikononi mwao waovu.

¹²Nilikuwa katika raha, naye akanivunja-vunja; Naam, amenishika shingo, na kuniponda; Tena amenisimamisha niwe shabaha yake.

¹³Wapigaji wake wa mishale hunizingira kotekote, Hunipasua viuno vyangu, asinihurumie; Nyonga zangu amezimwaga juu ya nchi.

¹⁴Hunivunja kwa uvunjifu juu ya uvunjifu; Hunishambulia mfano wa jitu shujaa.

¹⁵Nimeshona nguo ya magunia juu ya mwili wangu, Na pembe yangu nimeidhili uvumbini.

¹⁶Uso wangu umeharibika kwa kutoa machozi, Na giza tupu li katika kope zangu;

¹⁷Ijapokuwa hapana jeuri mikononi mwangu, Na kuomba kwangu ni safi.

¹⁸Ee nchi, usiifunike damu yangu, Na kilio changu kisipate mahali pa kupumzika.

¹⁹Hata sasa, tazama, shahidi wangu yuko mbinguni. Na huyo atakayenidhamini yuko juu.

²⁰Rafiki zangu hunidharau; Lakini jicho langu humwagia Mungu machozi;

²¹Laiti angemtolea mtu hoja mbele ya Mungu, Amtetee na mwanadamu mbele ya jirani yake.

²²Kwani ikiisha pita miaka michache, Nitakwenda njia hiyo ambayo sitarudi tena.