Ayubu - Sura ya 38

¹Ndipo Bwana akamjibu Ayubu katika upepo wa kisulisuli, na kusema,

²Ni nani huyu atiaye mashauri giza Kwa maneno yasiyo na maarifa?

³Basi jifunge viuno kama mwanamume, Maana nitakuuliza neno, nawe niambie.

⁴Ulikuwa wapi nilipoiweka misingi ya nchi? Haya! Sema, kama ukiwa na ufahamu.

⁵Ni nani aliyeamrisha vipimo vyake, kama ukijua? Au ni nani aliyenyosha kamba juu yake?

⁶Misingi yake ilikazwa juu ya kitu gani? Au ni nani aliyeliweka jiwe lake la pembeni,

⁷Hapo nyota za asubuhi zilipoimba pamoja, Na wana wote wa Mungu walipopiga kelele kwa furaha?

⁸Au ni nani aliyeifunga bahari kwa milango, Hapo ilipofurika kana kwamba imetoka tumboni.

⁹Nilipolifanya wingu kuwa vazi lake, Na giza zito kuwa nguo ya kuifungia,

¹⁰Nikaiagiza amri yangu; Nikaiwekea makomeo na milango,

¹¹Nikasema, Utafika mpaka hapa, lakini hutapita, Na hapa mawimbi yako yanyetayo yatazuiliwa?

¹²Je! Umeiamuru asubuhi tangu siku zako zilipoanza? Umeyajulisha mapambazuko mahali pake?

¹³Yapate kuishika miisho ya nchi, Waovu wakung'utwe wakawe mbali nayo?

¹⁴Hubadilika mfano wa udongo chini ya muhuri, Vitu vyote vinatokea kama mavazi.

¹⁵Na waovu nuru yao huzuiliwa isiwafikie, Na mkono ulioinuka huvunjika.

¹⁶Je! Umeziingia chemchemi za bahari, Au umetembea mahali pa siri pa vilindi?

¹⁷Je! Umefunuliwa malango ya mauti, Au umeyaona malango ya kuzimu?

¹⁸Umeyafahamu mapana ya dunia? Haya! Sema, ikiwa unayajua hayo yote.

¹⁹Iko wapi njia ya kuyafikia makao ya nuru? Na giza pia, mahali pake ni wapi?

²⁰Upate kuipeleka hata mpaka wake, Upate kuelewa na mapito ya kuiendea nyumba yake?

²¹Hukosi unajua, maana ulizaliwa wakati huo, Na hesabu ya siku zako ni kubwa!

²²Je! Umeziingia ghala za theluji, Au umeziona ghala za mvua ya mawe,

²³Nilizoziweka akiba kwa wakati wa misiba, Kwa siku ya mapigano na vita?

²⁴Je! Nuru hutengwa kwa njia gani, Au upepo wa mashariki hutawanywaje juu ya nchi?

²⁵Ni nani aliyepasua mfereji kwa maji ya gharika, Au njia kwa umeme wa radi;

²⁶Kunyesha mvua juu ya nchi isiyo na watu; Juu ya jangwa asiyokaa mwanadamu;

²⁷Kuishibisha nchi iliyo kame na ukiwa, Na kuyameza majani yaliyo mororo?

²⁸Je! Mvua ina baba? Au ni nani aliyeyazaa matone ya umande?

²⁹Barafu ilitoka katika tumbo la nani? Na sakitu ya mbinguni ni nani aliyeizaa?

³⁰Maji hugandamana kama jiwe, Na uso wa vilindi huganda kwa baridi.

³¹Je! Waweza kuufunga mnyororo wa Kilimia, Au kuvilegeza vifungo vya Orioni?

³²Je! Waweza kuziongoza Sayari kwa wakati wake? Au waweza kuongoza Dubu na watoto wake?

³³Je! Unazijua amri zilizoamuriwa mbingu? Waweza kuyathibitisha mamlaka yake juu ya dunia?

³⁴Waweza kuiinua sauti yako mpaka mawinguni, ili wingi wa maji ukufunikize?

³⁵Waweza kuutuma umeme, nao ukaenda, Ukakuambia, Sisi tupo hapa?

³⁶Je! Ni nani aliyetia hekima moyoni? Au ni nani aliyetia ufahamu rohoni?

³⁷Ni nani awezaye kuyahesabu mawingu kwa hekima? Au ni nani awezaye kuzimimina chupa za mbinguni?

³⁸Wakati mavumbi yagandamanapo, Na madongoa kushikamana pamoja?

³⁹Je! Utamwindia simba mke mawindo? Au utashibisha njaa ya simba wachanga,

⁴⁰Waoteapo mapangoni mwao, Wakaapo mafichoni wapate kuvizia?

⁴¹Ni nani anayempatia kunguru chakula, Makinda yake wanapomlilia Mungu, Na kutanga-tanga kwa kutindikiwa na chakula?