Maombolezo - Sura ya 3

¹Mimi ni mtu aliyeona mateso Kwa fimbo ya ghadhabu yake.

²Ameniongoza na kuniendesha katika giza Wala si katika nuru.

³Hakika juu yangu augeuza mkono wake Mara kwa mara mchana wote.

⁴Amechakaza nyama yangu na ngozi yangu; Ameivunja mifupa yangu.

⁵Amejenga boma juu yangu, Na kunizungusha uchungu na uchovu.

⁶Amenikalisha penye giza, Kama watu waliokufa zamani.

⁷Amenizinga pande zote hata siwezi kutoka; Ameufanya mnyororo wangu mzito.

⁸Naam, nikilia na kuomba msaada, Huyapinga maombi yangu.

⁹Ameziziba njia zangu kwa mawe yaliyochongwa; Ameyapotosha mapito yangu.

¹⁰Alivyo kwangu ni kama dubu aoteaye, Kama simba aliye mafichoni.

¹¹Amezigeuza njia zangu, na kunirarua-rarua; Amenifanya ukiwa.

¹²Ameupinda upinde wake, Na kunifanya niwe shabaha kwa mshale.

¹³Amenichoma viuno Kwa mishale ya podo lake.

¹⁴Nimekuwa dhihaka kwa watu wangu wote; Wimbo wao mchana kutwa.

¹⁵Amenijaza uchungu, Amenikinaisha kwa pakanga.

¹⁶Amenivunja meno kwa changarawe; Amenifunika majivu.

¹⁷Umeniweka nafsi yangu mbali na amani; Nikasahau kufanikiwa.

¹⁸Nikasema, Nguvu zangu zimepotea, Na tumaini langu kwa Bwana.

¹⁹Kumbuka mateso yangu, na msiba wangu, Pakanga na nyongo.

²⁰Nafsi yangu ikali ikiyakumbuka hayo, Nayo imeinama ndani yangu.

²¹Najikumbusha neno hili, Kwa hiyo nina matumaini.

²²Ni huruma za Bwana kwamba hatuangamii, Kwa kuwa rehema zake hazikomi.

²³Ni mpya kila siku asubuhi; Uaminifu wako ni mkuu.

²⁴Bwana ndiye fungu langu, husema nafsi yangu, Kwa hiyo nitamtumaini yeye.

²⁵Bwana ni mwema kwa hao wamngojeao, Kwa hiyo nafsi imtafutayo.

²⁶Ni vema mtu autarajie wokovu wa Bwana Na kumngojea kwa utulivu.

²⁷Ni vema mwanadamu aichukue nira Wakati wa ujana wake.

²⁸Na akae peke yake na kunyamaza kimya; Kwa sababu Bwana ameweka hayo juu yake.

²⁹Na atie kinywa chake mavumbini; Ikiwa yamkini liko tumaini.

³⁰Na amwelekezee yule ampigaye shavu lake; Ashibishwe mashutumu.

³¹Kwa kuwa Bwana hatamtupa mtu Hata milele.

³²Maana ajapomhuzunisha atamrehemu, Kwa kadiri ya wingi wa huruma zake.

³³Maana moyo wake hapendi kuwatesa wanadamu. Wala kuwahuzunisha.

³⁴Kuwaseta chini kwa miguu Wafungwa wote wa duniani,

³⁵Kuipotosha hukumu ya mtu Mbele zake Aliye juu,

³⁶Na kumnyima mtu haki yake, Hayo Bwana hayaridhii kabisa.

³⁷Ni nani asemaye neno nalo likafanyika, Ikiwa Bwana hakuliagiza?

³⁸Je! Katika kinywa chake Aliye juu Hayatoki maovu na mema?

³⁹Mbona anung'unika mwanadamu aliye hai Mtu akiadhibiwa kwa dhambi zake?

⁴⁰Na tuchunguze njia zetu na kuzijaribu, Na kumrudia Bwana tena.

⁴¹Na tumwinulie Mungu aliye mbinguni Mioyo yetu na mikono.

⁴²Sisi tumekosa na kuasi; Wewe hukusamehe.

⁴³Umetufunika kwa hasira na kutufuatia; Umeua, wala hukuona huruma.

⁴⁴Umejifunika nafsi yako kwa wingu, Maombi yetu yasipite.

⁴⁵Umetufanya kuwa takataka, na vifusi Katikati ya mataifa.

⁴⁶Juu yetu adui zetu wote Wametupanulia vinywa vyao.

⁴⁷Hofu imetujilia na shimo, Ukiwa na uharibifu.

⁴⁸Jicho langu lachuruzika mito ya maji Kwa ajili ya uvunjifu wa binti ya watu wangu.

⁴⁹Jicho langu latoka machozi lisikome, Wala haliachi;

⁵⁰Hata Bwana atakapoangalia Na kutazama toka mbinguni.

⁵¹Jicho langu lanitia huzuni nafsini mwangu, Kwa sababu ya binti zote za mji wangu.

⁵²Walio adui zangu bila sababu Wameniwinda sana kama ndege;

⁵³Wameukatilia mbali uhai wangu gerezani, Na kutupa jiwe juu yangu.

⁵⁴Maji mengi yalipita juu ya kichwa changu, Nikasema, Nimekatiliwa mbali.

⁵⁵Naliliitia jina lako, Bwana, kutoka lile shimo Liendalo chini kabisa.

⁵⁶Ukaisikia sauti yangu; usifiche sikio lako Ili usisikie pumzi yangu, kwa kilio changu.

⁵⁷Ulinikaribia siku ile nilipokulilia; Ukasema, Usiogope.

⁵⁸Ee Bwana umenitetea mateto ya nafsi yangu; Umeukomboa uhai wangu.

⁵⁹Umekuona kudhulumiwa kwangu, Ee Bwana; Unihukumie neno langu.

⁶⁰Umekiona kisasi chao chote, Na mashauri yao yote juu yangu.

⁶¹Ee Bwana, umeyasikia matukano yao, Na mashauri yao yote juu yangu;

⁶²Midomo yao walioinuka juu yangu Na maazimio yao juu yangu mchana kutwa.

⁶³Uangalie kuketi kwao, na kuinuka kwao; Wimbo wao ndio mimi.

⁶⁴Utawalipa malipo, Ee Bwana, Sawasawa na kazi ya mikono yao.

⁶⁵Utawapa ushupavu wa moyo; Laana yako juu yao.

⁶⁶Utawafuatia kwa hasira, na kuwaangamiza Wasiwe tena chini ya mbingu za Bwana.