Zaburi - Sura ya 103

¹Ee nafsi yangu, umhimidi Bwana. Naam, vyote vilivyo ndani yangu Vilihimidi jina lake takatifu.

²Ee nafsi yangu, umhimidi Bwana, Wala usizisahau fadhili zake zote.

³Akusamehe maovu yako yote, Akuponya magonjwa yako yote,

⁴Aukomboa uhai wako na kaburi, Akutia taji ya fadhili na rehema,

⁵Aushibisha mema uzee wako, Ujana wako ukarejezwa kama tai;

⁶Bwana ndiye afanyaye mambo ya haki, Na hukumu kwa wote wanaoonewa.

⁷Alimjulisha Musa njia zake, Wana wa Israeli matendo yake.

⁸Bwana amejaa huruma na neema, Haoni hasira upesi, ni mwingi wa fadhili.

⁹Yeye hatateta sikuzote, Wala hatashika hasira yake milele.

¹⁰Hakututenda sawasawa na hatia zetu, Wala hakutulipa kwa kadiri ya maovu yetu.

¹¹Maana mbingu zilivyoinuka juu ya nchi, Kadiri ile ile rehema zake ni kuu kwa wamchao.

¹²Kama mashariki ilivyo mbali na magharibi, Ndivyo alivyoweka dhambi zetu mbali nasi.

¹³Kama vile baba awahurumiavyo watoto wake, Ndivyo Bwana anavyowahurumia wamchao.

¹⁴Kwa maana Yeye anatujua umbo letu, Na kukumbuka ya kuwa sisi tu mavumbi.

¹⁵Mwanadamu siku zake zi kama majani; Kama ua la kondeni ndivyo asitawivyo.

¹⁶Maana upepo hupita juu yake, kumbe haliko! Na mahali pake hapatalijua tena.

¹⁷Bali fadhili za Bwana zina wamchao Tangu milele hata milele, Na haki yake ina wana wa wana;

¹⁸Maana, wale walishikao agano lake, Na kuyakumbuka maagizo yake ili wayafanye.

¹⁹Bwana ameweka kiti chake cha enzi mbinguni, Na ufalme wake unavitawala vitu vyote.

²⁰Mhimidini Bwana, enyi malaika zake, Ninyi mlio hodari, mtendao neno lake, Mkiisikiliza sauti ya neno lake.

²¹Mhimidini Bwana, enyi majeshi yake yote, Ninyi watumishi wake mfanyao mapenzi yake.

²²Mhimidini Bwana, enyi matendo yake yote, Mahali pote pa milki yake. Ee nafsi yangu, umhimidi Bwana.