Zaburi - Sura ya 22

¹Mungu wangu, Mungu wangu, Mbona umeniacha? Mbona U mbali na wokovu wangu, Na maneno ya kuugua kwangu?

²Ee Mungu wangu, nalia mchana lakini hujibu Na wakati wa usiku lakini sipati raha.

³Na Wewe U Mtakatifu, Uketiye juu ya sifa za Israeli.

⁴Baba zetu walikutumaini Wewe, Walitumaini, na Wewe ukawaokoa.

⁵Walikulilia Wewe wakaokoka, Walikutumaini wasiaibike.

⁶Lakini mimi ni mdudu wala si mtu, Laumu ya wanadamu na mzaha wa watu.

⁷Wote wanionao hunicheka sana, Hunifyonya, wakitikisa vichwa vyao;

⁸Husema, Umtegemee Bwana; na amponye; Na amwokoe sasa, maana apendezwa naye.

⁹Naam, Wewe ndiwe uliyenitoa tumboni, Ulinitumainisha matitini mwa mama yangu.

¹⁰Kwako nalitupwa tangu tumboni, Toka tumboni mwa mamangu ndiwe Mungu wangu.

¹¹Usiwe mbali nami maana taabu i karibu, Kwa maana hakuna msaidizi.

¹²Mafahali wengi wamenizunguka, Walio hodari wa Bashani wamenisonga;

¹³Wananifumbulia vinywa vyao, Kama simba apapuraye na kunguruma.

¹⁴Nimemwagika kama maji, Mifupa yangu yote imeteguka, Moyo wangu umekuwa kama nta, Na kuyeyuka ndani ya mtima wangu.

¹⁵Nguvu zangu zimekauka kama gae, Ulimi wangu waambatana na taya zangu; Unaniweka katika mavumbi ya mauti

¹⁶Kwa maana mbwa wamenizunguka; Kusanyiko la waovu wamenisonga; Wamenizua mikono na miguu.

¹⁷Naweza kuihesabu mifupa yangu yote; Wao wananitazama na kunikodolea macho.

¹⁸Wanagawanya nguo zangu, Na vazi langu wanalipigia kura.

¹⁹Nawe, Bwana, usiwe mbali, Ee Nguvu zangu, fanya haraka kunisaidia.

²⁰Uniponye nafsi yangu na upanga, Mpenzi wangu na nguvu za mbwa.

²¹Kinywani mwa simba uniokoe; Naam, toka pembe za nyati umenijibu.

²²Nitalihubiri jina lako kwa ndugu zangu, Katikati ya kusanyiko nitakusifu.

²³Ninyi mnaomcha Bwana, msifuni, Enyi nyote mlio wazao wa Yakobo, mtukuzeni, Mcheni, enyi nyote mlio wazao wa Israeli.

²⁴Maana hakulidharau teso la mteswa, Wala hakuchukizwa nalo; Wala hakumficha uso wake, Bali alipomlilia akamsikia.

²⁵Kwako zinatoka sifa zangu Katika kusanyiko kubwa. Nitaziondoa nadhiri zangu Mbele yao wamchao.

²⁶Wapole watakula na kushiba, Wamtafutao Bwana watamsifu; Mioyo yenu na iishi milele.

²⁷Miisho yote ya dunia itakumbuka, Na watu watamrejea Bwana; Jamaa zote za mataifa watamsujudia.

²⁸Maana ufalme una Bwana, Naye ndiye awatawalaye mataifa.

²⁹Wakwasi wote wa dunia watakula na kusujudu, Humwinamia wote washukao mavumbini; Naam, yeye asiyeweza kujihuisha nafsi yake,

³⁰Wazao wake watamtumikia. Zitasimuliwa habari za Bwana, Kwa kizazi kitakachokuja,

³¹Nao watawahubiri watakaozaliwa haki yake, Ya kwamba ndiye aliyeyafanya.