Zaburi - Sura ya 57

¹Unirehemu, Ee Mungu, unirehemu mimi, Maana nafsi yangu imekukimbilia Wewe. Nitaukimbilia uvuli wa mbawa zako, Hata misiba hii itakapopita.

²Nitamwita MUNGU Aliye juu, Mungu anitimiziaye mambo yangu.

³Atapeleka toka mbinguni na kuniokoa, Atukanapo yule atakaye kunimeza. Mungu atazipeleka Fadhili zake na kweli yake

⁴Nafsi yangu i kati ya simba, Nitastarehe kati yao waliowaka moto. Wanadamu meno yao ni mikuki na mishale, Na ndimi zao ni upanga mkali.

⁵Ee Mungu, utukuzwe juu ya mbingu, Na juu ya nchi yote uwe utukufu wako.

⁶Wameweka wavu ili kuninasa miguu; Nafsi yangu imeinama; Wamechimba shimo mbele yangu; Wametumbukia ndani yake!

⁷Ee Mungu, moyo wangu u thabiti, Moyo wangu u thabiti. Nitaimba, nitaimba zaburi,

⁸Amka, utukufu wangu. Amka, kinanda na kinubi, Nitaamka alfajiri.

⁹Ee Bwana, nitakushukuru kati ya watu, Nitakuimbia zaburi kati ya mataifa.

¹⁰Maana fadhili zako ni kubwa hata mbinguni, Na uaminifu wako hata mawinguni.

¹¹Ee Mungu, utukuzwe juu ya mbingu, Na juu ya nchi yote uwe utukufu wako.