Zaburi - Sura ya 60

¹Ee Mungu, umetutupa na kututawanya, Umekuwa na hasira, uturudishe tena.

²Umeitetemesha nchi na kuipasua, Upaponye palipobomoka, maana inatikisika.

³Umewaonyesha watu wako mazito, Na kutunywesha mvinyo ya kutuyumbisha.

⁴Umewapa wakuogopao bendera, Ili itwekwe kwa ajili ya kweli.

⁵Ili wapenzi wako waopolewe, Uokoe kwa mkono wako wa kuume, utuitikie.

⁶Mungu amenena kwa utakatifu wake, Nami nitashangilia. Nitaigawanya Shekemu, Nitalipima bonde la Sukothi.

⁷Gileadi ni yangu, na Manase ni yangu, Na Efraimu ni nguvu ya kichwa changu. Yuda ni fimbo yangu ya kifalme,

⁸Moabu ni bakuli langu la kunawia. Nitamtupia Edomu kiatu changu, Na kumpigia Filisti kelele za vita.

⁹Ni nani atakayenipeleka hata mji wenye boma? Ni nani atakayeniongoza hata Edomu?

¹⁰Ee Mungu, si Wewe uliyetutupa? Wala, Ee Mungu, hutoki na majeshi yetu?

¹¹Utuletee msaada juu ya mtesi, Maana wokovu wa binadamu haufai.

¹²Kwa msaada wa Mungu tutatenda makuu, Maana Yeye atawakanyaga watesi wetu.