Zaburi - Sura ya 74

¹Ee Mungu, mbona umetutupa milele? Kwa nini hasira yako inatoka moshi Juu ya kondoo wa malisho yako?

²Ulikumbuke kusanyiko lako, Ulilolinunua zamani. Ulilolikomboa liwe kabila ya urithi wako, Mlima Sayuni ulioufanya maskani yako.

³Upainulie miguu yako palipoharibika milele; Adui ameufanya kila ubaya katika patakatifu.

⁴Watesi wako wamenguruma kati ya kusanyiko lako; Wameweka bendera zao ziwe alama.

⁵Wanaonekana kama watu wainuao mashoka, Waikate miti ya msituni.

⁶Na sasa nakishi yake yote pia Wanaivunja-vunja kwa mashoka na nyundo.

⁷Wamepatia moto patakatifu pako; Wamelinajisi kao la jina lako hata chini.

⁸Walisema mioyoni mwao, Na tuwaangamize kabisa; Mahali penye mikutano ya Mungu Wamepachoma moto katika nchi pia.

⁹Hatuzioni ishara zetu, wala sasa hakuna nabii, Wala kwetu hakuna ajuaye, hata lini?

¹⁰Ee Mungu, mtesi atalaumu hata lini? Adui alidharau jina lako hata milele?

¹¹Mbona unaurudisha mkono wako, Naam, mkono wako wa kuume, Uutoe kifuani mwako, Ukawaangamize kabisa.

¹²Lakini Mungu ni mfalme wangu tokea zamani, Afanyaye mambo ya wokovu katikati ya nchi.

¹³Wewe umeipasua bahari kwa nguvu zako, Umevivunja vichwa vya nyangumi juu ya maji.

¹⁴Wewe uliviseta vichwa vya lewiathani, Awe chakula cha watu wa jangwani.

¹⁵Wewe ulitokeza chemchemi na kijito; Wewe ulikausha mito yenye maji sikuzote.

¹⁶Mchana ni wako, usiku nao ni wako, Ndiwe uliyeufanya mwanga na jua.

¹⁷Wewe uliiweka mipaka yote ya dunia, Kaskazi na kusi Wewe ulizitengeneza.

¹⁸Ee Bwana, uyakumbuke hayo, adui amelaumu, Na watu wapumbavu wamelidharau jina lako.

¹⁹Usimpe mnyama mkali nafsi ya hua wako; Usiusahau milele uhai wa watu wako walioonewa.

²⁰Ulitafakari agano; Maana mahali penye giza katika nchi Pamejaa makao ya ukatili.

²¹Aliyeonewa asirejee ametiwa haya, Mnyonge na mhitaji na walisifu jina lako.

²²Ee Mungu, usimame, ujitetee mwenyewe, Ukumbuke unavyotukanwa na mpumbavu mchana kutwa.

²³Usiisahau sauti ya watesi wako, Ghasia yao wanaokuondokea inapaa daima.