Zaburi - Sura ya 84

¹Maskani zako zapendeza kama nini, Ee Bwana wa majeshi!

²Nafsi yangu imezionea shauku nyua za Bwana, Naam, na kuzikondea. Moyo wangu na mwili wangu Vinamlilia Mungu aliye hai.

³Shomoro naye ameona nyumba, Na mbayuwayu amejipatia kioto, Alipoweka makinda yake, Kwenye madhabahu zako, Ee Bwana wa majeshi, Mfalme wangu na Mungu wangu.

⁴Heri wakaao nyumbani mwako, Wanakuhimidi daima.

⁵Heri ambaye nguvu zake zatoka kwako, Na njia ziendazo Sayuni zimo moyoni mwake.

⁶Wakipita kati ya bonde la Vilio, Hulifanya kuwa chemchemi, Naam, mvua ya vuli hulivika baraka

⁷Huendelea toka nguvu hata nguvu, Huonekana Sayuni kila mmoja mbele za Mungu.

⁸Bwana, Mungu wa majeshi, uyasikie maombi yangu, Ee Mungu wa Yakobo, usikilize,

⁹Ee Mungu, ngao yetu, uangalie, Umtazame uso masihi

¹⁰Hakika siku moja katika nyua zako Ni bora kuliko siku elfu. Ningependa kuwa bawabu nyumbani mwa Mungu wangu, Kuliko kukaa katika hema za uovu.

¹¹Kwa kuwa Bwana, Mungu, ni jua na ngao, Bwana atatoa neema na utukufu. Hatawanyima kitu chema Hao waendao kwa ukamilifu.

¹²Ee Bwana wa majeshi, Heri mwanadamu anayekutumaini Wewe.