Zaburi - Sura ya 9

¹Nitamshukuru Bwana kwa moyo wangu wote; Nitayasimulia matendo yako yote ya ajabu;

²Nitafurahi na kukushangilia Wewe; Nitaliimbia jina lako, Wewe Uliye juu.

³Kwa sababu adui zangu hurudi nyuma; Hujikwaa na kuangamia mbele zako.

⁴Kwa maana umenifanyia hukumu na haki Umeketi kitini pa enzi ukihukumu kwa haki.

⁵Umewakemea mataifa; Na kumwangamiza mdhalimu; Umelifuta jina lao milele na milele;

⁶Adui wamekoma na kuachwa ukiwa milele. Nayo miji yao uliing'oa; Hata kumbukumbu lao limepotea.

⁷Bali Bwana atakaa milele, Ameweka kiti chake tayari kwa hukumu.

⁸Naye atauhukumu ulimwengu kwa haki; Atawaamua watu kwa adili.

⁹Bwana atakuwa ngome kwake aliyeonewa, Naam, ngome kwa nyakati za shida.

¹⁰Nao wakujuao jina lako wakutumaini Wewe, Maana Wewe, Bwana hukuwaacha wakutafutao.

¹¹Mwimbieni Bwana akaaye Sayuni, Yatangazeni kati ya watu matendo yake.

¹²Maana mlipiza kisasi cha damu awakumbuka, Hakukisahau kilio cha wanyonge.

¹³Wewe, Bwana, unifadhili, Tazama mateso niteswayo na wanaonichukia; Wewe uniinuaye katika malango ya mauti,

¹⁴Ili nizisimulie sifa zako zote; Katika malango ya binti Sayuni Nitaufurahia wokovu wako.

¹⁵Mataifa wamezama katika shimo walilolifanya; Kwa wavu waliouficha imenaswa miguu yao.

¹⁶Bwana amejidhihirisha na kutekeleza hukumu; Amemnasa mdhalimu kwa kazi ya mikono yake.

¹⁷Wadhalimu watarejea kuzimu, Naam, mataifa yote wanaomsahau Mungu.

¹⁸Kwa maana mhitaji hatasahauliwa daima; Matumaini ya wanyonge hayatapotea milele.

¹⁹Bwana, usimame, mwanadamu asipate nguvu, Mataifa wahukumiwe mbele zako.

²⁰Bwana, uwawekee kitisho, Mataifa na wajijue kuwa ni binadamu.