Zaburi - Sura ya 93

¹Bwana ametamalaki, amejivika adhama, Bwana amejivika, na kujikaza nguvu. Naam, ulimwengu umethibitika usitikisike;

²Kiti chako kimekuwa thabiti tokea zamani; Wewe ndiwe uliye tangu milele.

³Ee Bwana, mito imepaza, Mito imepaza sauti zake, Mito imepaza uvumi wake.

⁴Kupita sauti ya maji mengi, maji makuu, Kupita mawimbi ya bahari yaumkayo, Bwana Aliye juu ndiye mwenye ukuu.

⁵Shuhuda zako ni amini sana; Utakatifu ndio uifaao nyumba yako, Ee Bwana, milele na milele.