Zaburi - Sura ya 94

¹Ee Bwana, Mungu wa kisasi, Mungu wa kisasi, uangaze,

²Mwenye kuihukumu nchi, ujitukuze, Uwape wenye kiburi stahili zao.

³Bwana, hata lini wasio haki, Hata lini wasio haki watashangilia?

⁴Je! Wote watendao uovu watatoa maneno, Na kusema majivuno, na kufanya kiburi?

⁵Ee Bwana, wanawaseta watu wako; Wanautesa urithi wako;

⁶Wanamwua mjane na mgeni; Wanawafisha yatima.

⁷Nao husema, Bwana haoni; Mungu wa Yakobo hafikiri.

⁸Enyi wajinga miongoni mwa watu, fikirini; Enyi wapumbavu, lini mtakapopata akili?

⁹Aliyelitia sikio mahali pake asisikie? Aliyelifanya jicho asione?

¹⁰Awaadibuye mataifa asikemee? Amfundishaye mwanadamu asijue?

¹¹Bwana anajua mawazo ya mwanadamu, Ya kuwa ni ubatili.

¹²Ee Bwana, heri mtu yule umwadibuye, Na kumfundisha kwa sheria yako;

¹³Upate kumstarehesha siku za mabaya, Hata asiye haki atakapochimbiwa shimo.

¹⁴Kwa kuwa Bwana hatawatupa watu wake, Wala hutauacha urithi wake,

¹⁵Maana hukumu itairejea haki, Na wote walio wanyofu wa moyo wataifuata.

¹⁶Ni nani atakayesimama Kwa ajili yangu juu ya wabaya? Ni nani atakayenisaidia Juu yao wafanyao maovu?

¹⁷Kama Bwana asingalikuwa msaada wangu, Nafsi yangu kwa upesi ingalikaa penye kimya.

¹⁸Niliposema, Mguu wangu unateleza; Ee Bwana, fadhili zako zilinitegemeza.

¹⁹Katika wingi wa mawazo ya moyoni mwangu, Faraja zako zaifurahisha roho yangu.

²⁰Je! Kiti cha udhalimu kishirikiane nawe, Kitungacho madhara kwa njia ya sheria?

²¹Huishambulia nafsi yake mwenye haki, Na kuihukumu damu isiyo na hatia.

²²Lakini Bwana amekuwa ngome kwangu, Na Mungu wangu mwamba wangu wa kukimbilia.

²³Naye atawarudishia uovu wao, Atawaangamiza katika ubaya wao, Naam, Bwana, Mungu wetu, atawaangamiza.