Wimbo Ulio Bora - Sura ya 2

¹Mimi ni ua la uwandani,

²Kama nyinyoro kati ya miiba, Kadhalika mpenzi wangu kati ya binti.

³Kama mpera kati ya miti ya msituni, Kadhalika mpendwa wangu kati ya vijana. Naliketi kivulini mwake kwa furaha, Na matunda yake naliyaonja kuwa matamu.

⁴Akanileta mpaka nyumba ya karamu, Na bendera yake juu yangu ni mapenzi.

⁵Nishibisheni zabibu, niburudisheni kwa mapera, Kwa maana nimezimia kwa mapenzi.

⁶Mkono wake wa kushoto uko chini ya kichwa changu, Nao wa kuume unanikumbatia!

⁷Nawasihi, enyi binti za Yerusalemu, Kwa paa na kwa ayala wa porini, Msiyachochee mapenzi, wala kuyaamsha, Hata yatakapoona vema yenyewe.

⁸Sikiliza! Ni mpendwa wangu! Tazama, anakuja, Akiruka milimani, akichachawa vilimani.

⁹Mpendwa wangu ni kama paa, au ayala. Tazama, asimama nyuma ya ukuta wetu, Achungulia dirishani, atazama kimiani.

¹⁰Mpendwa wangu alinena, akaniambia, Ondoka, mpenzi wangu, mzuri wangu, uje zako,

¹¹Maana tazama, kaskazi imepita, Masika imekwisha, imekwenda zake;

¹²Maua yatokea katika nchi, Wakati wa kupelea umefika, Na sauti ya mwigo husikiwa kwetu.

¹³Mtini wapevusha tini zake, Na mizabibu inachanua, Inatoa harufu yake nzuri; Ondoka, mpenzi wangu, mzuri wangu, uje zako.

¹⁴Hua wangu, mafichoni mwa jabali, Katika sitara za magenge, Nitazame uso wako, nisikie sauti yako, Maana sauti yako ni tamu na uso wako mzuri.

¹⁵Tukamatie mbweha, Wale mbweha wadogo, Waiharibuo mizabibu, Maana mizabibu yetu yachanua.

¹⁶Mpendwa wangu ni wangu, na mimi ni wake; Hulisha kundi lake penye nyinyoro.

¹⁷Hata jua lipunge, na vivuli vikimbie, Unigeukie, mpendwa wangu, Nawe uwe kama paa, au ayala, Juu ya milima ya Betheri.